Edición 2026
Micah P. Hinson
>
Teatro Colón – A Coruña
23 de outubro de 2026 · Venres > 21:00 h
Micah P. Hinson actuará no Teatro Colón da Coruña dentro do ciclo Intermodal, nun concerto único en Galicia dentro da súa xira europea.
Micah P. Hinson é un dos últimos malditos do cancioneiro do século XXI, e un deses artistas que soaron a clásico desde o seu debut, hai pouco máis de 20 anos. O seu concerto chega nun momento clave na traxectoria do artista, marcado por un profundo proceso de transformación persoal e creativa que deu lugar ao seu novo traballo, The Tomorrow Man.
Un novo capítulo: The Tomorrow Man
O sinxelo “Oh, Sleepyhead”, unha canción nacida nun dos momentos máis intensos e vulnerables da súa vida incluída no seu último traballo The Tomorrow Man, aborda a necesidade de romper cunha realidade asfixiante e afrontar o doloroso pero necesario camiño cara á liberdade persoal.
Cunha sonoridade máis ampla ca en traballos anteriores, a canción incorpora arranxos orquestrais xunto á Benevento Orchestra dirixida por Raffaele Tiseo, marcando unha evolución no seu característico universo introspectivo. Este novo repertorio reflicte un cambio vital: deixar atrás o peso do pasado para construír unha narrativa ancorada no presente, tanto no persoal como no artístico.
Traxectoria e evolución artística
Nado en Memphis e criado en Texas, Micah P. Hinson é considerado unha figura de culto dentro do alt-folk estadounidense. A súa carreira comezou co aclamado Micah P. Hinson and the Gospel of Progress (2004), que lle abriu as portas de Europa e consolidou unha fiel base de seguidores.
Tras máis de dez álbums, a súa obra estivo marcada por unha intensa carga autobiográfica, explorando desde os seus anos máis turbulentos ata a súa madurez persoal. Porén, en 2020 atravesou unha crise creativa que o levou a replantexar a súa relación coa música e a súa forma de escribir cancións.
O punto de inflexión chegou na súa colaboración co produtor italiano Alessandro “Asso” Stefana, con quen iniciou unha nova etapa creativa que desemboca en The Tomorrow Man, un disco escrito entre Texas e España e concibido como a súa primeira obra plenamente conectada co presente.
Este renacemento artístico transformou non só a súa música, senón tamén a súa visión vital, dando lugar a cancións máis abertas, honestas e emocionalmente directas.
Unha cita única en Galicia
O concerto na Coruña será unha oportunidade excepcional para descubrir esta nova etapa en directo, nun formato íntimo e próximo que potencia a intensidade emocional do seu repertorio.
José González
>
Palacio da Ópera – A Coruña
10 de bullo de 2026 · Venres > 21:00 h
O músico sueco presentará o seu novo disco nun concerto que percorrerá tamén algúns dos temas máis emblemáticos da súa carreira
José González é recoñecido como un dos intérpretes en directo máis cativadores da música contemporánea. As súas actuacións móvense con naturalidade entre unha intimidade case susurrada e un son poderoso e cheo de matices, onde ritmos complexos e cambios dinámicos enchen a sala e manteñen o público completamente concentrado. Crea unha sensación de escala e profundidade que fai que cada concerto resulte expansivo, intenso e emocionalmente resonante. Ten esgotado entradas de maneira constante en salas de concertos e teatros de todo o mundo, construíndo unha reputación global como un artista imprescindible en directo.
Co lanzamento do seu novo álbum Against The Dying Of The Light, publicado o 27 de marzo —precedido polos sinxelos “Pajarito” e o tema que dá título ao disco—, González regresa aos escenarios con novo material que amplía o seu inconfundible son. O álbum reflexiona sobre a humanidade, a tecnoloxía e a incerta dirección do mundo contemporáneo, combinando estas temáticas co seu característico estilo de composición melódica e rítmica. No seu próximo directo, estas novas cancións entrelázanse con algúns dos temas máis destacados do seu repertorio, equilibrando introspección e forza rítmica.
Desde o seu álbum de debut Veneer (2003), que inclúe o icónico tema “Heartbeats”, José González construíu unha reputación internacional ao longo de máis de dúas décadas de aclamada composición e xiras. O seu último álbum de estudo, Local Valley, publicouse en 2021, seguido en 2023 por unha celebrada edición do 20.º aniversario de Veneer e unha intensa xira internacional durante 2023 e 2024. Agora regresa cun novo disco e un renovado espectáculo en directo que reflicte a amplitude da súa evolución artística.
Os concertos de José González caracterízanse pola precisión, a calidez e unha forte presenza escénica: actuacións nas que conviven o detalle sutil e un son expansivo, e nas que o público se ve envolto nunha atmosfera compartida de atención e emoción. A próxima xira presenta un artista no momento máis alto da súa traxectoria, ofrecendo unha experiencia en directo que é ao mesmo tempo íntima e monumental.
mariagrep & Mundo Prestigio
>
Mondo Club – Vigo
15 de maio de 2026 · Venres > 21:00 h
A artista compostelá e o grupo vigués fúndense en «Voy a pensar en ti”, e presentarán en Vigo un EP conxunto no que alumbran o groove do novo pop.
O vindeiro 15 de maio de 2026, o Mondo Club acollerá un dos directos máis especiais da tempada coa actuación conxunta de mariagrep y Mundo Prestigio, dentro do ciclo Intermodal.
A artista compostelá e o grupo vigués presentan sobre o escenario o seu primeiro traballo conxunto, o EP “Voy a pensar en ti”, un proxecto que nace de anos de afinidade artística e colaboracións previas, e que agora cristaliza nunha proposta compartida onde ambas identidades se funden nunha soa.
Este traballo supón un exercicio de sinestesia sonora no que conflúen os seus universos creativos, dando lugar a un son propio dentro da escena alternativa estatal. O EP móvese entre o groove do novo pop e unha estética que dialoga con referencias como Clairo, Men I Trust ou Khruangbin, transitando entre a sensualidade da canción melódica dos anos 70 e unha psicodelia suave e envolvente.
A unión de mariagrep y Mundo Prestigio non é casual: ambos proxectos xa cruzaran camiños en temas como “Cogollito” ou “Superbuena”, anticipando unha conexión artística que agora se formaliza neste lanzamento e nunha xira que percorrerá distintas cidades ao longo de 2026.
O directo en Vigo será unha oportunidade única para experimentar en vivo esta proposta híbrida, onde a atmosfera, o groove e a complicidade escénica fan resoar ecos e influencias que nos poden levar polos camiños de Clairo, Men I Trust, Elia y Elizabeth, Faye Webster, Susana Estrada ou Khruangbin, entre outros, construíndo unha experiencia sonora singular.
Ademais, o EP verá a luz nunha edición limitada en vinilo de 10”, dispoñible en concertos e tendas especializadas, reforzando o carácter especial deste lanzamento.
Data: 15 de maio de 2026
Cidade: Vigo
Ciclo: Intermodal
Sala: Mondo Club